एनटीपीसी सोलापूरचा स्तुत्य उपक्रम; ग्रामीण क्रीडा स्पर्धेत आहेरवाडी संघ विजेता...

 

फताटेवाडी | हॅलो रिपोर्टर न्यूज | मुख्य संपादक डॉ. राजदत्त रासोलगीकर : एनटीपीसी सोलापूरने आपल्या कॉर्पोरेट सोशल रिस्पॉन्सिबिलिटी (CSR) उपक्रमांतर्गत आयोजित केलेल्या ग्रामीण क्रीडा स्पर्धेला उत्स्फूर्त प्रतिसाद मिळाला. आहेरवाडी, फताटेवाडी, होटगी स्टेशन आणि तिल्लेहाळ या गावांच्या सहभागातून झालेल्या क्रिकेट स्पर्धेत आहेरवाडी संघाने विजेतेपद पटकावले, तर फताटेवाडी संघ उपविजेता ठरला.

गुरुवारी (26 मार्च) पार पडलेल्या या स्पर्धेचा मुख्य उद्देश ग्रामीण युवकांना एकत्र आणणे, त्यांच्यातील खेळाडूवृत्तीला चालना देणे आणि सामाजिक एकात्मता वाढवणे हा होता.

स्पर्धेचे उद्घाटन एनटीपीसी सोलापूरचे कार्यकारी संचालक बी. जे. सी. शास्त्री यांच्या हस्ते झाले. यावेळी बोलताना त्यांनी खेळामुळे शारीरिक आणि मानसिक विकासासोबतच समाजात एकता आणि बंधुत्वाची भावना दृढ होत असल्याचे सांगितले.

या कार्यक्रमाला महाव्यवस्थापक (संचालन व देखभाल) एम. के. बेबी, महाव्यवस्थापक (देखभाल व अतिरिक्त प्रशासन) सुभाषिस बंदोपाध्याय, तसेच एनटीपीसीचे वरिष्ठ अधिकारी, कर्मचारी आणि विविध गावांचे सरपंच मोठ्या संख्येने उपस्थित होते.

स्पर्धेतील अंतिम सामना रोमांचक ठरला. फताटेवाडी संघाने प्रथम फलंदाजी करत 12 षटकांत 105 धावा केल्या. त्याला प्रत्युत्तर देताना आहेरवाडी संघाने उत्कृष्ट खेळ करत 106 धावांचे लक्ष्य गाठले आणि विजेतेपदावर शिक्कामोर्तब केले.

समारोप सोहळ्यात विजेत्या आणि उपविजेत्या संघांचा सत्कार करण्यात आला. उपस्थित ग्रामप्रतिनिधींनी एनटीपीसीच्या या उपक्रमाचे कौतुक करत भविष्यातही अशा स्पर्धा आयोजित करण्याची अपेक्षा व्यक्त केली.

एनटीपीसी सोलापूरचा हा उपक्रम ग्रामीण भागातील युवकांना प्रोत्साहन देण्याबरोबरच सामाजिक सलोखा आणि विकासासाठी महत्त्वपूर्ण ठरत आहे.

आपल्या परिसरातील विश्वासार्ह बातम्यांचे व्यासपीठ...

बातम्या / जाहिरातीसाठी संपर्क करा:

डॉ. राजदत्त रासोलगीकर

मुख्य संपादक

मो. 9923393329

आपली बातमी, आपला आवाज – थेट जनतेपर्यंत..!