पहिल्याच पावसात समाज मंदिरात पाणी..! ₹८.४५ लाखांच्या कामाचा फज्जा? गंगेवाडीतील वडार समाज मंदिराच्या निकृष्ट बांधकामाचा ग्रामस्थांचा आरोप; चौकशीची मागणी तीव्र...

 

गंगेवाडी | हॅलो रिपोर्टर न्यूज | मुख्य संपादक : डॉ. राजदत्त रासोलगीकर

महाराष्ट्र शासनाच्या २५१५ ग्रामविकास सुधारणा कार्यक्रम अंतर्गत ₹८,४५,९२७ खर्चून गंगेवाडी येथे उभारण्यात आलेल्या वडार समाज मंदिराच्या बांधकामावर पुन्हा एकदा गंभीर प्रश्नचिन्ह निर्माण झाले आहे. पहिल्याच जोरदार पावसानंतर समाज मंदिरात पाणी शिरल्याने निकृष्ट दर्जाच्या कामाचे आरोप अधिक तीव्र झाले आहेत.

यापूर्वीच मंदिराच्या फरशा असमतोल बसविणे, पिलर्सवरील प्लास्टर निघणे, छताचे निकृष्ट काम आणि दर्जाहीन साहित्य वापरल्याचे आरोप ग्रामस्थांनी केले होते. आता पावसाचे पाणी थेट समाज मंदिरात शिरल्याने या आरोपांना अधिक बळ मिळाल्याचे नागरिकांचे म्हणणे आहे.

शासनाच्या लाखो रुपयांच्या निधीतून उभारलेल्या इमारतीची ही अवस्था पाहून ग्रामस्थांनी तीव्र संताप व्यक्त केला आहे. संबंधित बांधकामाची तांत्रिक तपासणी करून दोषी अधिकारी, ठेकेदार व संबंधितांवर कठोर कारवाई करावी, तसेच निकृष्ट कामाची दुरुस्ती करून नागरिकांना सुरक्षित व दर्जेदार समाज मंदिर उपलब्ध करून द्यावे, अशी मागणी जोर धरत आहे.

ग्रामस्थांच्या मते, विकासकामांमध्ये केवळ निधी खर्च झाल्याचे दाखवून चालणार नाही, तर प्रत्यक्षात गुणवत्तापूर्ण काम होणेही तितकेच आवश्यक आहे. गंगेवाडीतील या प्रकरणामुळे सार्वजनिक बांधकामांच्या गुणवत्तेबाबत पुन्हा प्रश्न उपस्थित झाले आहेत.

टीप: या बातमीत नमूद केलेले निकृष्ट बांधकाम व पाणी शिरल्याबाबतचे आरोप स्थानिक ग्रामस्थांनी केले असून, संबंधित अधिकारी किंवा ठेकेदार यांची अधिकृत बाजू अद्याप समोर आलेली नाही. ती उपलब्ध झाल्यास तीही प्रसिद्ध करण्यात येईल. पा